前幾日有人想知我到底遇過咩野麻煩/有趣客，我又隨隨便便up下。
雖然自問自己公司都做得未夠好，好難捉摸既客人總會有很多，以下只係客觀睇法，冇任何人身攻擊意思
1) 色盲或無錢修理電腦mon或個mon調色較光/暗既人
每個月總有一兩單認為件貨唔岩色既人，比如話:我買果時幅圖明明係鮮紅色，但而家件衫偏暗，唔係我要果隻色，貨不對辦。一打開條link，原來人地Description有寫係暗紅色(英文)，呀客人英文麻麻，隔Mon望見件衫好鮮色但又原來係因為個Mon 個調色光到差唔到100%… 當然，好好解釋過後，最後當然係被罵收場啦，客人都需要落台階嘛
題外話… 無論係咩相機，都未必出到紫色，如果介意呢D野既，建議都係望一望實物先再網購。
2)喜歡要買手估自己著乜野碼數既人
每個月都一定有好多人問:我183cm連/高登仔，62kg重,我應該著S定M? 我U記著開L碼，你估Stussy L岩唔岩我? 雖然今日遇見呢類客人，我已經完全麻木左，但一開頭其實我真係會諗:我真係答得到你? 定係呢個係一個評估我係唔係騙子既問題，話岩即係亂黎，係呃錢。其實香港有樣野真係好好，先唔好理價錢先，但各類品牌水貨要搵一定有。你要知Size，搵間做緊炒價既實體店試下就掂，真係無必要都唔好走黎問米，我真係唔知岩唔岩你呢…
3)驗屍官
要數麻煩客，驗屍官絕對係數一數二。乜野叫驗屍官呢?其實就係每每買左件貨黎到都要細細檢查好好品味既人。其實都只是個人性格，無乜所謂，但如果件貨佢地認為有少少少少少少花/污糟之類，你就大獲了。我曾經試過因為一對HKD1xx既鞋上面有一條絕對可以用手/水卒得走既痕俾客告上消委會，我收到信後仲大大聲問番果邊點邊個原因咁無聊都接，你又煩我又煩。做代購代運生意既，真係特別怕呢類人，大佬呀… 少少質素有問題我真係保唔到架…我賺你十幾二十蚊一件架咋，放過我啦
下次講下代購技巧 – 點買炒價波鞋~
