好歌分享(一) – 五月天 – 頑固 – 人生無限公司

近年我愛上了聽五月天的歌，聽它有多熱血，聽它有多勵志，人長大了，有點夢想就是遠去了，但是還是能靠歌曲尋回一下昔日的自己，當中其中最喜歡的就係呢首”頑固”。

故事講述有一個中年大叔明明兒時有航天的夢想，但長大後卻一事無成，有一日，佢係7仔遇上一個太空人，呢個太空人就送左本整火箭既書俾佢，燃起佢整火箭漫遊太空既夢想。好不切實際既願望，但卻一定令到千千萬萬個創業人有所共鳴。

每一日都係度無間斷的工作，賺到的並不多，比起外邊安安穩穩的打工仔們，自己除左每日擔憂生活開支外，仲要受親人痛罵說沒出息跟無所事事，當天諗創業一切是美好的，如今狂熱和衝動都不知冷卻沒有。

不斷不斷反問著自己，這些年，讓步的，你是否，會嘆息．．．有什麼，是你永遠不放棄？

一次一次你，吞下了淚滴，一次一次拚回破碎自己，

一天一天你，是否還相信，活在你心深處，那頑固自己？

打算掉低夢想或者已經掉低左既千千萬萬香港同胞，不妨一齊聽一次吧？

走過的，叫足跡，走不到，叫憧憬

在此特別感謝我的女朋友介紹五月天的好歌給我。3月月中我將會去高雄欣賞他們的演唱會，有機會就見個面吧。

Published by: SunMarket

創業雜談(三) – 理想與現實(上)

[有得揀，梗要做老闆] 我諗無論係邊代人，都一定會聽過類似既一句說話。係香港地有邊個打工仔心底裡唔係好似黃子華咁聽到”番工”兩隻未就頭痛？有人問我到底做老闆係咪真係咁舒服，係咪真係咁自由，D朋友見我一年去幾次旅行，係咪又真係咁輕鬆，我又趁呢個機會分享一下。我既答案是”不”，冇乜野覺悟既話你最好唔好同創業扯上關係。

理想一) 搵人幫我做野咪得囉

現實：我曾以為做老闆是有得say的，嗯…都冇錯，起碼我可以選擇放唔放棄做落去囉。創業係Startup階段既，你如果唔係有父蔭拎左一個幾球創業既，一個人做晒所有野是常識。好似做代購咁，由Promo，出單，收單，訂貨，派貨，追單，投訴，全部一個人自己包辦，到你做到點成績，請到了一些Part Time，你還是得花時間去管。我曾有一段時間不去管他們，結果？一個臨走時偷了不少東西我卻苦無證據，一個就在我公司插手制打Winning Eleven。叫人做野，指指點點，好似好開心，但其實有苦自己知。你轉個頭，佢地又在打手機Game了。又或我曾經叫一間公司幫我Tailor Made 一個網頁，十多萬，鴻圖大志要開發新市場，心想錢都付了，優質的網頁效果是一定吧？根本不需要擔心什麼，便任由他們處理，沒多介入。結果就是他們把我的Case掉給大陸人處理，再把他們自己的資源胡亂拼湊成我的網頁，錢付了，結果是造了一個連Freelancer 寫的也不如的網頁，搜尋個商品都會死機，還常常說修不好，調整下市場策略，改少少野又要5位數字，仲要唔包整得好。最諷刺係最後佢交件垃圾俾你，你仲要每年供10% Maintenance。搵人幫你做野唔係唔得，你拎住幾百萬咪得囉，不過我拎住幾百萬既話，我會去買樓收租，唔係創業囉。

理想二) 我今日唔想開工所以咪唔開工囉

現實：惰性就係人既天性，做員工，你唔開工，即係同老闆申請炒魷。做老闆，貴為最高果位，你唔想，邊有人敢叫你開工？無架，你可以唔開工，鋪都可以關埋，不過就蝕一日錢蝕一日人氣囉。我公司一日營運資金最少講緊1400~1500起跳，今日唔知聽日事，你今日只係賺左1600，你敢唔敢聽日唔開工？就算執5000+，我一樣唔敢，邊個會知聽日我會唔會一單都無？創業頭3年，我每日都24小時電腦連叉電跟身，去旅利拎住5磅重既野上山，每一天12:01am~5:00a.m.都要回客同落單，就算今日系統上好點了，有員工幫手，一樣要做到4:00~5:00a.m.，風雨不改，旺季更要做到11:00am+。唔想開工都要開，邊有得講享唔享受，一天偷懶就是蝕一天的錢，不會變的。

理想三) 我可以決定公司想點行就點行wo

現實：係架，都無錯，你想點行都得。行得岩就高興，行錯就自己受就係人都知，但最好玩既莫過於其實你做完個決定係岩係錯幾個月內都唔會知。打工仔有樣野好，就係人地叫你做乜就做得，政府工更好，出晒Guideline教你點做，做多反而唔好。做老闆，你連放個屁寫個Blog都唔知叫好定唔好。就好似情人節你帶你女友去食野，俾你打骰，你反而唔太知帶佢去邊好，一陣揀錯佢黑面就大獲，興幸你都有佢過去背景資料，錯極都有個譜，做老闆就係要預測未來走向做決定，做錯？搞到公關災難？學劉青雲話齋，屎都冇得你食呀。

雖然我非常贊成李+x講既”打工係最愚蠢既投資”，但如果各位無一個長期覺悟，隨便便決定創業的話，就真係祝你好運了。不過，如果你問我點解講到咁痛苦都捱得過的話，我會告訴你，時間是自己的，工時是彈性的，這是最棒的了，沒有這個優勢我就真老早不做了。

Published by: SunMarket