創業雜談(四) – 確定創業的一刻

本人2011年11月開始創業至今，由零做起，雖然不算有大成就，但起碼衣食無憂(性格黎，本人喜歡賺夠就算)。唔算咩創業大前輩，但有好野一定會分享分享。前幾日有人Inbox問我咩時候開始決定要創業，我就借今日分享少少自己經歷。

簡單介紹(無興趣可省略):

說來慚愧，本人雖然喜歡打電玩，討厭讀書，但至少還是入讀了當年酷稱最強既恒生商學預科書院(考左3次會考先入到… 第一次會考10分，呢個又係另一個勵志故事)，最後又搞下搞下入左某某大學會計系。明明Year 2已經周圍同人唱自己唔會做朝8晚?既Auditor，到最後因為自己好想去外國做野而走左既新加坡某某公司做Auditor (我係果度拎最高級外國人pass架~掛住專業兩字去外國做野好吃香)。果然唔洗一年頂唔住死板式Audit工作辭職番香港，一路搵工一路搞呢彈野出黎(太多經歷，下刪萬字)。

簡單介紹完畢，今次所講既係令我確定自己非創業不可既一次重要經歷。每個創業人都總會有呢一刻來臨..!

是咁的，就算Auditor唔太岩我，我依然未有一個拋低一切創業既決心，所以我都同大眾一樣，呢度interview下，果度又試下。有一日，就有一間南洋商業銀行打電話黎話要group in 我一個類似business analyst既位，由於我叫做係以普通話+英語既新加坡浸過下，咩group in 我根本無有怕，九秒九應承並動身去in。

我好記得當年面試內容，果時有大約十個考生，有三個考官，其實只是一個好常見的面試。Part 1 自我介紹，好似是英文啦，平平無奇，略過，Part 2才是重點所在。

好記得當時的問題是討論香港的公屋不足同埋冇錢買樓問題，呢個問題，作為岩岩係新加坡番黎既我簡直係最適合，稍有常識都知道，新加坡現存公屋(HDB)制度係非常好的，簡單黎講，就係佢地會強迫每個人既收入一大部份去儲錢，香港儲夠係退休用，新加坡儲夠就係買樓俾首期，而一般儲幾年就一定夠，而新加坡所有有私樓既人係絕對唔可以有公屋係手，所以唔太炒得起(而家唔知喇，當年係炒唔起)，如果香港而家果D叫辣招，新加坡既政策係令樓價連高都抬唔起。點都好，我好清楚，同只係畢左業半至一年既後生比，我呢個體驗應該夠我KO晒所有考生，而事實都係，我就好似一個Leader咁Lead晒十個人，就好似會議入面既決策人咁…一切非常順利，每個人都以為我勝券在握了。

完了Part 2，就在此時，有趣的Part 3來了。這個才是直接改變我人生的轉捩點。考官要求考生每人選一個佢最想合作同最唔想合作既人，並講出原因… 我敢說，在眾多interview入面，我從未試過有一張成績表好得過呢張，因為9個考生入面，有8個都最想和我共事，原因都是說我有主見，唔離地，有見地之類，還有1個是不想和我共事(有趣吧，9個人選的人都有我出現)，原因就是佢想講的我都講了(自認冗員!?)，如果呢個世界有民選Man of the interview，我敢講我就係了，這份工應該冇走雞了吧？

考官們就說可以了，除了某2~3個人需要修改一點個人資料外，其他人可以走了，因為不包括我，所以我懷著坐定粒六既心情離開了。可結果還是令人失望的，原因那些被叫去修改資料的，是因為已經決定即時Final in他們了，我即時被放棄了，我還可笑地在兩星期後追問可以請我未，太天真… 太年輕了。

那之後的幾天我都在想: 為什麼? 我拿出了150分的表現，為什麼還是要失敗。是的，這不是一份非常好的工作，但至少我的表現絕對值得得到一個Final in 的offer。我能帶領隊伍，我有決策能力，我可以比任何人做得更好，別人都愛跟我合作，沒有機會是為什麼?我真的想不透。

你可以說我是鑽牛角尖吧，一星期後我得出了答案: 這份工不欣賞我的決策能力，是因為他們只需要一個按本子辦事的人;他們不需要能帶領隊伍的人，因為他們只需要一頭任他們差遣的綿羊;他們不用自己的員工做得比自己更好，因為他們不需要做得比他們更好的人;他們不需要受人愛戴的人，因為他們不想自己的員工比自己更受人愛戴。既然你們不欣賞150分的我，我也沒必要繼續待在不欣賞我的人存在的地方。

說實在的，當8個人都希望和我共事但他們也不給我機會時，一切命運已訂下來了。如果所謂”打工”都是這樣子的話，那好的，我就自己創一番事業算了。這就是我一切的開始了。及後我是找到了會計師的工作啦… 但半工半創業半年就辭職去了。到今天我還是覺得自己沒選錯吧。

 

呢個就係我確定創業的一刻了~其他野，有機會再講吧。如果你地有關於任何網上買野/創業既問題，歡迎直接fb inbox我，必覆&抱歉文太長了。

Published by: shcheng4

創業雜談(二) – 壓力

有個大我幾年既創業前輩成日同人講: 100個人創業3年, 90個人收工, 6個人吊命, 3個人合併, 1人上市。

其實就我角度，呢個數字都還算樂觀，應該係1000個人創業3年，950個人收工，47人吊命，3人合併，0人上市。開左3年就話自己成功果D，跟住幾年仲有得你捱呀。

係香港，做生意話易唔易，做小生意就得要照顧香港低質麻煩客，做大又要同大財團競爭，今日唔知聽日事，回想當年開展自己事業，開初還真一波三折，過程中最痛苦的，莫過於壓力，壓力來自邊？我唔直接回答你，我用例子答你。

 

一) 親朋戚友壓力

來前家庭既壓力絕對係萬惡之首。屋企一句：[點解你唔正正經經搵份工呀？]，再正常不過的關心句子，但仔女聽落就係：[仲搞D乜鬼古靈精怪野丫，收皮啦。]。需知道做生意唔係包賺，一定會有辛苦日子，一定會有回本期，仲要唔穩定，但由於你上一輩供你讀書只係想你搵份好工，搞三搞四已經大大偏離正軌，風險太大，90%情況下你都會聽到苦口婆心既刺耳說話，要不令你眼淚搒飯地繼續，要不令你主動放棄，我就唯有整天企在天橋上自言自語抒援壓力。其他親戚閒言閒語，相比下就冇咁大殺傷力了。

二) 金錢壓力

創業係咪可以唔洗錢？我可以答係。因為我當年開展事業時，銀行就只有3000元正。比起以前，要由0開始一件事其實唔難，真係唔難。開個fb page 開個ig post，你有單先訂貨，左手交右手，總有懶客人搵上你，賺到錢wo。但係當你以為自己好掂，想開間公司仔請個人做野，又係另一件事，又租又人工又水電，一連幾日甚至幾個月蝕錢絕對係等閒事，試過有一兩日無生意，精神繃緊，不斷朝思亂想，覺得自己做得唔好，無用無出息，而且呢種狀況往往會係Keep住出現。三個結果，你EQ高地繼續苦苦經營，你放棄，又或你患上思覺失調。

三) 精神壓力

當每個人星期六日諗住去邊度玩時，你仲係度繼續做做做，慢慢你就會鍊出唔做唔開心既精神壓力。無野俾你做，你就會立刻感到好大壓力，好似仲係差D野未做好咁。我試過背住一部重5磅既電腦係日本行山，因為我好驚部有人搵我做野，我試過係壽司鋪食食下野拎電腦出黎做野，只係因為有件小問題發生。所謂精神壓力，未創過業既人一定不會懂的

四) 客人壓力

[明明件事都唔關你事，點解要俾人拎黎出氣？]，呢個雖然已經習慣晒，但呢類壓力有時都係仲會困擾自己。好似我代購咁，其實有時貨來錯了或遲了，9成機會都係外在因素影響，要不發錯貨，要不發漏貨，又或係最近新年咁，人地強國人要休息半個月，遲來貨。總會有D客唔理解狀況出言悔辱，個人認為香港人俾左錢就是皇帝的態度跟強國人是不遑多讓的。呢個壓力最容易搞跨一盤生意，我都曾經都輸在此下，當你打算黑面還反罵這些人的時候，你就已經輸了，佢地會更高興地跟你勇鬥到底的，蝕底的是自己。要個初創業的人睇面色捱罵聽歪理，太難了吧？

 

其實呢D都係我個人初期創業徵狀，我相信壓力因人而異。世間梗有一D奇人異仕可以快樂無悠咁開創自己事業，不過一介凡人的我並不是就是了。純粹分享啦。下次再分享個技術帖吧。

Published by: shcheng4